A satisfactory day at MMR Embassy

အရင်ကတော့ မြန်မာ သံရုံးမှာ အခွန်ဆောင်တာ ပါတ်စ်ပို့ သက်တမ်းတိုးရတာ အိပ်မက်ဆိုးကြီး တစ်ခုလိုပါဘဲ။ သံရုံးက ပြန်လာတိုင်း မရိုးနိုင်တဲ့ ပြဿနာတွေ ပြောဖို့ ပုံပြင်တစ်ခုတော့ ပြန်ပါလာတတ်ကြတယ်။ အများအားဖြင့် သံရုံးသွားတိုင်း မကျေမနပ်နဲ့ ပြန်လာရတာများပေမယ့် ဒီတစ်ခေါက်တော့ တော်တော် အဆင်ပြေခဲ့ပါတယ်။ နောက်ဆို အမြဲသာ ဒီလိုအဆင်ပြေမယ်ဆိုရင် ၄လတစ်ခါလောက် စိတ်ကူးပေါက်တိုင်း အခွန်သွားဆောင်မိနိုင်တယ်။ :D
 

သောကြာနေ့က ပါတ်စ်ပို့သက်တမ်းတိုးဖို့ ကေအယ်လ် မြန်မာသံရုံးကို တစ်ခေါက်ရောက်ခဲ့တယ်။ မနက် ၉နာရီ ၁၅လောက်ရောက်တော့ သံရုံးကောင်တာမဖွင့်သေးပေမယ့် လူတော်တော်များများတော့ ရောက်နေကြပြီ။ ရောက်ရောက်ချင်း ဓါတ်ပုံရိုက်တဲ့နေရာကိုသွား ရင်းဂစ် ၁၂ကျပ်ပေးပြီး ဓါတ်ပုံရိုက်၊ ပြီးတော့ နံပါတ်စဉ်တပ်ထားတဲ့ ဖောင်တစ်ခုပေးတယ်။ ကိုယ့်နံပါတ်က ၅၄။ သံရုံးမဖွင့်သေးတော့ ခဏထိုင်စောင့်တယ်။ သံရုံးဝင်းထဲမှာ အမိုးလုပ်ထားပေးပြီး ထိုင်ခုံတွေ အများကြီး ချထားပေးတယ်။ အဲကွန်းတွေ ဘာတွေနဲ့ အခန်းကြီး မဟုတ်ပေမယ့် ခါတိုင်းလို မတ်တပ်ရပ်မစောင့်ရတော့တာကိုဘဲ (အလွန့်အလွန်) ကျေးဇူးတင်မိတယ်။ ၁၀နာရီထိုးခါနီးတော့ ကောင်တာတွေ စဖွင့်တယ်။ အမှတ်စဉ်အလိုက် နံပါတ်ခေါ် ပြီးရင် ကောင်တာအလိုက် တန်းစီပေါ့။ ၁၀ယောက်တစ်ခါခေါ်တယ်။ နံပါတ်ခေါ်ရင် ကောင်တာသွား တန်းစီ၊ အခွန်ဘယ်လောက် ဆောင်ရမလဲဆိုတာ သူတို့ တွက်ပေးပါတယ်။ ပြီးရင် စာအုပ်အသစ်ဖိုး ၃၅၀နဲ့အတူ ဘဏ်မှာ ငွေသွားသွင်းပါတယ်။ ဘဏ်ကနေ Bank Slip ယူပြီးပြန်လာရင် သံရုံးမှာ တစ်ခါ ပြန်တန်းစီပါတယ်။ အရင်အခေါက်တွေတုန်းကလို တိုးတာ ဝှေ့တာတွေ သိပ်မရှိတော့ပါဘူး။ (တန်းစီတယ်ဆိုတာ အရှေ့ကနေ ဝင်စီသလား အနောက်ကနေ စီရသလား မသိတဲ့ တစ်ချို့ တစ်ချို့သောသူတွေက လွဲရင်ပေါ့လေ။) ကောင်တာ ၁ မှာ ဘဏ်ဖြတ်ပိုင်းပေးပြီး ကောင်တာ၂မှာ လက်ဗွေနဲ့ ထိုးမြဲလက်မှတ်ကို စက်နဲ့မှတ်ပါတယ်။ ပြီးရင် ညနေ ၄နာရီခွဲမှာ စာအုပ်ပြန်လာယူခိုင်းပါတယ်။ ပထမဆုံးပေးတဲ့ဖောင်မှာ လေးကြောင်းလောက် ရေးရတာကလွဲရင် ဘာဖောင်မှထပ် မဖြည့်ရဘဲ ရိုးရှင်းလွန်းတဲ့အတွက် ဟုတ်ရဲ့လားလို့တောင် သံသယ ဖြစ်မိသေးတယ်။

ဒါကတော့ သံရုံးမှာ လုပ်ထားပေးတဲ့ အမိုးအောက်မှာ ထိုင်ခုံနဲ့ ထိုင်စောင့်နေတုန်း ရိုက်ထားတာ။ ကောင်တာတွေ ရှေ့မှာ မှန်တစ်ချပ် ချိတ်ထားတာ ထူးဆန်းလို့။ ဓါတ်ပုံရိုက်တဲ့အခန်းနဲ့က တော်တော်လှမ်းတယ်။ မှန်ကိုဒီမှာထားတာ ဘာလုပ်ဖို့လဲမသိဘူး။ ကောင်တာမရောက်ခင် မှန်ကြည့်ပြီး အပြုံးလေ့ကျင့်ဖို့ထင်တယ်။ :D

နံပါတ် ၅၄ ဆိုလို့ နေ့တစ်ဝက်လောက်များ စောင့်ရမလားလို့။ ခဏလေး နာရီဝက်လောက်နဲ့ ကိုယ့်အလှည့် ရောက်လာတယ်။ သံရုံးသွားဖို့ ရက်ရွေးတာ မှန်သွားတယ်ထင်တယ် ;-) ဖေဖော်ဝါရီလောက်တုန်းက အခွန်သွားဆောင်တုန်းကနဲ့များ တစ်ခြားစီ။ အဲတုန်းက အခွန်လေး ဆောင်ဖို့အရေး တိုးလိုက်ရတာ သေမတတ်။ အခွန်ဘဲဆောင်မယ် သက်တမ်းတိုးဖို့ မဟုတ်ဘူးဆိုရင် ဘယ်ကောင်တာမှ စီရမလဲဆိုတာလည်း ဘယ်သူ့သွားမေးရမှန်းမသိ။ စီချင်တဲ့အတန်းထဲ ဝင်စီလိုက်တော့လည်း လစ်တာနဲ့ ကြားဖြတ်ဝင်ဖို့ ချောင်းနေတဲ့ သူတွေကလဲ မနည်းဘူး။ ကောင်တာတစ်ခုအရှေ့မှာ တန်းစီနေတာ စီနေရင်း ၂တန်း ဖြစ်သွားတာကလည်း ရှိသေးတယ်။ ဘေးနားက နည်းနည်း ခပ်စွာစွာ အမကြီးတွေ ဝင်ပြောတော့မှ ဘေးနာက ရောက်လာတဲ့ တစ်တန်းက အနောက်ပြန်သွားစီတော့တယ်။ လူလဲ ချွေးတလုံးလုံးနဲ့ ၂နာရီလောက် တန်းစီလိုက်ရတယ်။

 

မနေ့ကတော့ သောကြာနေ့ ဖြစ်နေလို့လား။ School Holiday မလို့လား။ သံရုံးရဲ့ အလုပ်လုပ်ပုံ ပိုစနစ်ကျပြီး မြန်ဆန်လာလို့လား။ ဘာဘဲဖြစ်ဖြစ် ပိုက်ဆံကုန် လူပန်းတာနဲ့စာရင် ဒီတစ်ခေါက်လိုမျိုး စနစ်တကျ အေးအေးဆေးဆေးလေး ပြီးသွားတာကို အရမ်းသဘောကျတယ်။ ညနေရောက်တော့ တစ်ခါပြန်သွား စာအုပ်ယူ၊ နာမည် မှန်လားစစ်ပြီး ပြန်ခဲ့ပါတယ်။ ဒီလိုနဲ့ The Republic of the Union of Myanmar (TROTUM) ပြည်ထောင်စု သမ္မတ မြန်မာနိုင်ငံတော်ကြီးရဲ့ နိုင်ငံတကာ အဆင့်မှီ ပါတ်စ်ပို့အသစ် လက်ဝယ်ရောက်ရှိလာပါတော့တယ်။
 

ခါတိုင်းဆို တိုးရဝှေ့ရ၊ အအော် အငေါက် အရစ်ခံရဆိုရင် သံရုံးသွားရတာ တစ်စက်မှ စိတ်မချမ်းသာပါဘူး။ ပိုက်ဆံအကုန်ခံ အလုပ်အပျက်ခံပြီး အဝေးကြီးကနေ တကူးတက လာရတဲ့အတွက် ဒီလို အဆင်ပြေပြေအေးအေးဆေးဆေး ပြီးသွားတော့ အရမ်းကို ကျေနပ်မိပါတယ်။ (မြန်မာနိုင်ငံသားဖြစ်ရတာ ခဏခဏ ပျော်ရတယ်။ မီးလာလဲပျော်ရ သံရုံးမှာ မတိုးရလဲ ပျော်ရတာဘဲပေါ့။) သံရုံးမှာ အခွန်ဆောင်ခဲ့သမျှထဲမှာ ဒီတစ်ခေါက်တော့ ကျေကျေနပ်နပ်ကြီးပေးခဲ့မိပါတယ်။

P.S သံရုံးလိပ်စာမသိရင် ဒီပို့မှာ တစ်ခေါက်ရေးဖူးပါတယ်။ (Myanmar Embassy Malaysia)

Myanmar Embassy (Malaysia)

သံရုံးမကြာခန (လေးနှစ်အတွင်းမှာ လေးခါ) ပြောင်းနေတော့ ဒီတစ်ခေါက်ရောက်တုန်း လိပ်စာနဲ့ ဖုန်းနံပါတ် မှတ်လာလိုက်တယ်။ လိုအပ်ရင် ပြန်ရှာရလဲ လွယ်အောင် တခြားသူတွေလည်း လိုချင်ရင် အလွယ်တကူ ဆက်သွယ်နိုင်အောင် တင်ပေးလိုက်ပါတယ်။ IT ခေတ်ဆိုတော့ ဂူဂယ်လ်မှာ ရှာခဲ့ရင် updated information ရတာပေါ့။ မလေးရှားမှာ နေနေသမျှ သံရုံးနဲ့ မကင်းကြတဲ့ သူတွေဘဲ မဟုတ်လား။ :) (သံရုံးရှေ့မှာ ချထားတဲ့ စာရွက် အပိုင်းလေးတွေကနေ ကူးလာတာပါ။ ဖုန်းတွေ အလုပ်လုပ်သလား မလုပ်ဘူးလားဆိုတာ ကျမလဲ မသိကြောင်းပါ။ နံပါတ်တွေတော့ အများကြီးဘဲ။)

Myanmar Embassy (Malaysia)
8 C, Jalan Ampang Hilir
55000, Kuala Lumpur
Malaysia
Phone: 03 4251 4455
03 4251 6355
03 4251 6455
03 4251 5595
Fax: 03 4251 3855

Putra LRT ရထားနဲ့လာရင် Ampang Park မှတ်တိုင်မှာ ဆင်းပြီး ဘတ်စ်ကားစောင့်ပါ။ ကားနံပါတ် ၂၈၊ ၇၈၊ ၇၉ တို့ကို နှစ်မှတ်တိုင်စီးပြီး Sucasa မှတ်တိုင်မှာဆင်းပါ။ (ကေအယ်လ်ထဲကနေ ဘတ်စ်ကားစီးပြီး လာမယ်ဆိုရင် ၂၈၊ ၇၈၊ ၇၉ ကားတွေကို Kota Raya ကနေစီးလို့ ရပါတယ်။) ကုန်းကျော်တံတားကို ဖြတ်ပြီးရင် တည့်တည့်ဆက်သွားပြီး မီးပွိုင့်ရောက်ရင် ညာချိုးပါ။ နည်းနည်းဆက်သွားပြီးလို့ လမ်းအဝိုင်းပါတ် တွေ့ရင် ဘယ်ဘက်ချိုးလိုက်ရင် ရောက်ပါပြီကွယ်။ အနီးစပ်ဆုံး မြေပုံတော့ ဒီမှာ သွားကြည့်ပါ။ Lanson Place နားမှာ ကွေ့ပြီး Ampang Hilir ထဲကို ဝင်ရပါမယ်။

အမှန်တော့ ပါတ်စ်ပို့သက်တမ်းတိုးရင် ဘာတွေလိုတယ်။ အခွန်ဆောင်မယ်ဆို ဘာတွေလိုတယ်။ အခွန်နှုန်း တွေပါ မှတ်ထားချင်တာ။ လူတွေ အရမ်း ရှုပ်နေလို့ မမှတ်ခဲ့ရဘူး။ website တစ်ခုနဲ့ အမြဲ update လုပ်ပေးနေရင် ကောင်းမယ်။ မဟုတ်ရင် တစ်ခါသွားလိုက် ပြန်လာလိုက် ပြန်သွားလိုက်ဆို မလွယ်ဘူး။

SELAMAT HARI RAYA

Selamat Hari Raya!

Maaf Zahir dan Batin.

ပျော်ရွှင်သော အစ်နေ့ ဖြစ်ပါစေ။ ဒီနေ့ october ၁ ရက်နေ့က အစ္စလာမ် ဘာသာဝင်တွေရဲ့ အစ်နေ့ပါ။ မြန်မာပြည်မှာတော့ ၂ ရက်နေ့ မှ ဖြစ်လိမ့်မယ်။ ကျမတော့ ရုံး ငါးရက် ပိတ်လို့ အရမ်းပျော်တယ်။ :) အစ္စလာမ်ဘာသာဝင်တွေရဲ့ ဥပုသ်လ အပြီးမှာ ကျင်းပတဲ့ ပွဲတော်ပါ။ Eid-ul-Fitir နဲ့ Eid-ul-Adha အစ်နေ့ နှစ်မျိုး ရှိပါတယ်။ အခု ဒီနေ့ ပွဲဟာ Eid-ul-Fitir လို့ ခေါ်ပါတယ်။ လ (moon) အပေါ်မှာ ကြည့်ပြီး ရက် တွက်ကြတာမို့ နိုင်ငံ တစ်နိုင်ငံနဲ့ တစ်နိုင်ငံ မတူပါဘူး။

မြန်မာပြည်မှာတော့ ဗလီတက်၊ အိမ်လည်ပြီး မုန့်စား၊ ကျောင်းပျက် (ကျောင်းမှ မပိတ်တာကိုး နော်)၊ မုန့်ဖိုးလိုက်တောင်းနဲ ့တော်တော် ပျော်စရာကောင်းပါတယ်။ အခုတော့ ကိုယ်လည်း မုန့်ဖိုး လိုက်တောင်းရမယ့် အရွယ်ကနေ မုန့်ဖိုး ပြန်ပေးရမယ့် အရွယ်ကိုလည်း ရောက်မှန်းမသိ ရောက်နေပြီ။ မလေးရှားမှာတော့ တော်တော်လေးကို ကြီးကြီး ကျယ်ကျယ် ဆင်နွှဲကြပါတယ်။ ဝန်ကြီးချုပ်နဲ့ ကက်ဘိနက် ကလည်း မုန့်တွေ အလကားကျွေးတယ်။ open house လို့ ခေါ်ပါတယ်။ ဒါပေမယ့် ဒီတစ်နှစ် open house မှာ ဟိန္ဒူ လူ့အခွင့်အရေးလှုပ်ရှားမှု အဖွဲ့က ဝန်ကြီးချုပ်ရဲ့ open house မှာ ဆန္ဒပြကြမယ်ဆိုလား ကြားနေရတယ်။ မလွယ်ဘူး။ ကျောင်းတက်တုန်းကတော့ ပျော်ဖို့ သိပ်မကောင်းဘူး။ မလေးလူမျိုးတွေ အားလုံး ရွာပြန်ကုန်တော့ ကျောင်းမှာ လူနည်းနည်းနဲ့ သရဲဘဲ ကျန်ခဲ့တယ်။ ခြောက်တီး ခြောက်ကပ်နဲ့။ နောက်မှဘဲ အသေးစိတ် ရေးပါဦးမယ်။ အခုတော့ အိမ် ပါတ်ပြီး မုန့်လိုက်စားလိုက်ဦးမယ်။ :)

လေ့လာမိသော မလေးလူမျိုးများဧ။် ရိုးရာဓလေ့ အမူအကျင့်များ

မလေးရှားနိုင်ငံမှာ မလေး၊ တရုတ်၊ အိန္ဒိယ တာမီလ် လူမျိုးတွေ အဓိက နေထိုင်တဲ့အတွက် ရိုးရာဓလေ့တော်တော်များများမှာ ဒီလူမျိုးစု သုံးခုလုံးရဲ့ ဓလေ့တွေ ထင်ဟပ်နေတာ တွေ့နိုင်ပါတယ်။ သူတို့လူမျိုးတွေဟာ တစ်ခါတစ်လေတော့ အင်မတန် မုန်းစရာကောင်းပေမယ့် တစ်ချို့ရိုးရာ ဓလေ့တွေကတော့ အားကျ အတုယူစရာ ကောင်းပါတယ်။ မလေးလူမျိုးတွေရဲ့ ရိုးရာဓလေ့ဆိုတဲ့အခါ အများအားဖြင့် မလေးမွတ်စလင်လူမျိုးတွေရဲ့ ဓလေ့တွေဖြစ်ပြီး တစ်ချို့ကတော့ လူမျိုးဘာသာမရွေး မလေးရှားနိုင်ငံသားတွေမှာ တွေ့ရတတ်တဲ့ ဓလေ့စရိုက်တွေပါ။

နှုတ်ဆက်ခြင်း

နှုတ်ဆက်တဲ့အခါ လက် နှစ်ဘက်လုံးကို သုံးပါတယ်။ တစ်ခြားသူနဲ့ လက်ဆွဲ နှုတ်ဆက်ပြီးရင် လက်ကို ရင်ဘတ်မှာ ကပ်လိုက်တယ်။ ရင်ထဲကနေ လှိုက်လှိုက် လှဲလှဲ နှုတ်ဆက်တယ် ဆိုတဲ့ သဘောတဲ့။ ကလေးလေးတွေက လူကြီးတွေရဲ့လက်ကို နမ်းပြီး နှုတ်ဆက်လေ့ရှိပါတယ်။ မလေးလူမျိုးတွေရဲ့ ချစ်စရာ ဓလေ့တစ်မျိုးပါဘဲ။ ဒါပေမယ့် မိသားစုဝင်တွေက လွဲရင် ယောကျာ်းနဲ့ မိန်းမ လက်ဆွဲ နှုတ်ဆက်လေ့ မရှိပါဘူး။

အစားအသောက်
အများအားဖြင့် မလေးလူမျိုးတွေဟာ ထမင်းစားရင် လက်နဲ့ စားကြပါတယ်။ အိမ်မှာတင် မဟုတ်ဘဲ မင်္ဂလာဆောင်မျိုး အခမ်းအနားကြီးတွေမှာပါမကျန် လက်နဲ့ စားပါတယ်။ ပြီးရင် မြန်မာပြည်မှာလို ဧည့်သည်ကို ဒါစားပါ ဟိုဟာစားပါဆိုပြီး ပြောလေ့ မရှိပါဘူး။ ဒါစားမလား ဒါယူမလားလို့ဘဲ မေးကြတယ်။ ကိုယ်က အားနာနေရင်တော့ ငတ်မှာသေချာတယ်။ အစကတော့ မသိဘူး။ အဲဒီလိုမေးတာ ဒီအတိုင်း ဝတ်ကျေ တန်းကျေ သဘောလောက် မေးတယ်လို့ဘဲ ထင်ထားတာ။ နောက်မှ သူတို့တွေကိုက အဲလိုဘဲ ပြောတတ်တယ်ဆိုတာ သိလာတယ်။ အုန်းသီး အရမ်းပေါတဲ့နိုင်ငံမို့လားတော့ မသိ အုန်းနို့ အရမ်းစားကြတယ်။ သူတို့ရဲ့ ဟင်းတွေမှာ အုန်းနို့မပါတာ ရှားတယ်။ ပဲပင်ပေါက်တောင် အုန်းနို့နဲ့ ကြော်တာတွေ့ရင် သဉ္ဖာပြောတာ မလွန်ဘူးဆိုတာ သိလာပါလိမ့်မယ်။ curry ဆိုရင်တော့ ပြီးရောဘဲ။ သူတို့ဆီမှာက အုန်းနို့မပါရင် ဟင်းအနှစ် ဖြစ်အောင် ချက်လို့ မရဘူးလို့ ခံယူထားတာ။ မနက်စာကိုလည်း Nasi lamek လို့ခေါ်တဲ့ အုန်းထမင်းကို နေ့စဉ်ရက်ဆက် စားနိုင်ကြတာ အံ့ဩမိတယ်။

မင်္ဂလာဆောင်

မလေးလူမျိုးတွေရဲ့ မင်္ဂလာဆောင် အကြောင်းပါ။ မင်္ဂလာဧည့်ခံပွဲ လာတက်တဲ့သူတွေကို ပန်းတစ်ပွင့်မှာ ကြက်ဥပြုတ်တစ်လုံးတွဲချည်ထားတာ လက်ဆောင်အဖြစ် ပေးပါတယ်။ Bunga Telur လို့ ခေါ်ပါတယ်။ ပိုက်ဆံပိုပြီး တတ်နိုင်တဲ့သူကတော့ လှတပတ ဘူးလေးတွေ(Egg holder) ထဲမှာ ကြက်ဥပြုတ် ထည့်ပြီး ပေးကြတယ်။ ဘူးရဲ့ ကွာလတီကနေ အဲဒီ မိသားစုရဲ့ ချမ်းသာ ကြွယ်ဝမှုကို သွယ်ဝိုက်သောနည်းအားဖြင့် ပြတယ်လို့ ပြောကြတယ်။ အဲဒီကြက်ဥပြုတ်လည်း နောက်ပိုင်း ဂုဏ်တုဂုဏ်ပြိုင်တွေရဲ့ ဓားစာခံ ဖြစ်မှန်းမသိ ဖြစ်လာသလိုပါဘဲ။

နေထိုင်မှု
တောရွာမှာနေ မြို့တက် အလုပ်လုပ်၊ ကျောင်းတက်ကြတာ များတယ်။ လမ်းပန်း ဆက်သွယ်ရေးက ကောင်းတော့ အလုပ်ပိတ် ကျောင်းပိတ်ရင် ရွာပြန်ကြတယ်။ balik kampung ပေါ့။ အခုလာမယ့် အစ်နေ့ (Hari raya) လိုမျိုးဆိုရင် လူတော်တော်များများ ရွာပြန်ကြလို့ highway တွေ အကုန် jam ဖြစ်ပြီး ကွာလာလမ်ပူမြို့ထဲမှာ ပြိုင်ကားမောင်းတဲ့ speed နဲ့ မောင်လို့ရလောက်အောင် လူရှင်းနေတတ်တယ်။ ဒါပေမယ့် သူတို့ ရွာတွေ တည်ထားတဲ့ ပုံက စနစ်တကျ မရှိဘူး။ မြေတွေ့ရင် အိမ်ဆောက်များ လုပ်ကြသလား မသိဘူး။ တစ်အိမ်နဲ့ တစ်အိမ် တော်တော် လှမ်းတယ်။

public holiday
အပေါ်မှာ ပြောခဲ့သလိုဘဲ မလေးရှားနိုင်ငံဟာ လူမျိုးစုကြီး သုံးခု အဓိက နေထိုင်တဲ့ နိုင်ငံ ဖြစ်တဲ့အတွက် ရုံးပိတ်ရက် အင်မတန် များပါတယ်။ ကမာ္ဘပေါ်မှာ ရုံးပိတ်ရက် အများဆုံးနိုင်ငံ လို့တောင် ပြောလို့ရမယ်လို့ ထင်ပါတယ်။ ကမာ္ဘပေါ်မှာ public holiday လို့ သတ်မှတ်ထားတဲ့ နေ့၊ နိုင်ငံရဲ့ လွတ်လပ်ရေးနေ့ တွေအပြင် အစ္စလာမ်၊ ဗုဒ္ဓဘာသာ၊ ခရစ်ယာန်၊ ဟိန္ဒူ ဘာသာ အားလုံးရဲ့ နေ့ထူးနေ့မြတ်တွေမှာ ရုံးပိတ်ပါတယ်။ အစ်နေ့၊ အစ္စလာမ် နှစ်သစ်ကူး၊ wesak day (ကဆုန်လပြည့်နေ့ ထင်တာဘဲ)၊ ဒေဝါလီနေ့၊ တိုင်ပူဆန်၊ တရုတ်နှစ်သစ်ကူး၊ ခရစ်စမတ် စသဖြင့် အများကြီးပါဘဲ။ ပြီးတော့ သက်ဆိုင်ရာပြည်နယ်တွေရဲ့ ဘုရင် မွေးနေ့တို့ ပြည်နယ် အထိမ်းအမှတ်နေ့တို့လဲ ပိတ်ပါတယ်။ အများအားဖြင့် နိုဝင်ဘာနဲ့ ဖေဖေါ်ဝါရီလ ကြားမှာ အများဆုံးပါဘဲ။ ကျောင်းတက်တုန်းကဆို အဲဒီအချိန်ဆို Semester II ပေါ့။ ကျောင်းချည်း ပိတ်နေတာနဲ့ တစ်ခါတစ်လေ စာသင်လို့တောင် မပြီးဘူး။ ပျမ်းမျှ တစ်ပါတ်မှာ ပိတ်ရက် တစ်ရက်လောက်ကို ရှိတာ။ တနလာင်္ကနေ သောကြာ အပြည့် တက်ရတဲ့ အပါတ်တွေက အရမ်းကို နည်းလွန်းတယ်။ ဒီလို ရုံးပိတ်ရက်များတဲ့ နိုင်ငံပါ။ အဲဒီလို ရုံးပိတ်ရက် များတဲ့အပြင် ဥပမာ public holiday က စနေ ဒါမှမဟုတ် တနင်္ဂနွေမှာ ကျတယ်ဆိုရင် နောက်အပါတ် တနင်္လာပါ ဆက်ပြီး ပိတ်ပေးတာ ထုံးစံပါ။ holiday အခွင့်အရေးကို လုံးဝအဆုံးရှုံး မခံတဲ့ နိုင်ငံပါ။

ဘာသာ စကား
အဓိက ရုံးသုံးစကားကတော့ မလေးစကားပေါ့။ မလေးရှားမှာ အဓိကအားဖြင့် အင်္ဂလိပ်စကားပြောရင် လား..လား..နဲ့ ဆုံးပါတယ်။ I don’t know lah.. Go and see yourself lah.. တရုတ်လူမျိုးတွေနဲ့ ပြောရင် မား..မား.. It’s not like that maa.. နဲ့ ဆုံးတယ်။ မလေးရှားကနေ ခွဲထွက်သွားတဲ့ စင်ကာပူမှာလည်း အခုထိ အဲဒီအကျင့် ရှိနေကြပါသေးတယ်။ ကိုယ်လည်း ဒီမှာ နေတာကြာသွားတော့ သူတို့လို အကျင့်ပါကုန်တယ်။

~စဉ်းစားမိသလောက်လေးတွေ ရေးလိုက်တာပါ။ ဆက်ပါဦးမယ်~

Photo credits:
http://flickr.com/photos/jamaludin/
http://1001craft.com
http://flickr.com/photos/9008346@N08
http://www.wkbc.org/

Are hackers targeting blogspot??

အခုတလော ဘလော့ဂ်ရဲ့ statistics တွေ မူမှန် ဖြစ်နေတယ်။ သတိထားမိတာ တစ်ပါတ်လောက်တော့ ရှိပြီ။ ကျမ ဘလော့ဂ်က ပုံမှန်ဆို hit ၃၀-၇ဝ လောက်ဘဲ ရှိတာ။ ကိုအန်ဒီ ရဲ့ feed roll ထဲရောက်သွားရင် တစ်ခါတစ်လေ ၁၀၀-၁၅၀။ အခုတလော တစ်ရက်ခြား တစ်ခါလောက် hit က ၃၀ဝ လောက် ဖြစ်ဖြစ်နေတယ်။ အဲဒီ အထဲက hit ၂၀ဝလောက်က IP address range တစ်ခုတည်းက ဖြစ်နေတယ်။ ISP က insignium llc ဆိုလား ဘာလားဘဲ။ Google မှာ ရှာကြည့်တော့လည်း ဒီ tweet တစ်ခုဘဲ တွေ့တယ်။ သူပြောတဲ့ ပုံအရတော့ hacker လိုလို ဘာလိုလိုဘဲ။ traffic တွေ အသေလွှတ်ပြီး ဘလော့ဂ် down အောင် လုပ်နေသလိုဘဲ။ သူ့ရဲ့ hit ကို ကြည့်လိုက်ရင် IP သုံးခုလောက်သုံးပြီး တစ်စက္ကန့်မှာ hit တစ်ခုလောက် ရှိနေတယ်။ bot တစ်ခုခုသုံးတယ် ထင်တယ်။ အရင်တုန်းက hacking class တက်တုန်းက ဟိုစပ်စပ် ဒီစပ်စပ် ရေးဖူးလို့များ ကိုယ့်ကို target ထားသလား မသိပါဘူး။ (အဲဒီအတန်းလဲ ပြီးအောင် မတက်လိုက်ပါဘူး။ အခုတောင် မေ့တေ့တေ့ ဖြစ်နေပြီ။) web server တွေ attack တို့ ဘာတို့ လုပ်ခံရတာတော့ ကြားဖူးတယ်။ ဒီလို blogspot ကိုကော attack လုပ်လို့ရလားဆိုတာတော့ မကြားဖူးဘူး။ hit သုံးရာလောက်ကို တွေးကြောက်နေတယ်လို့တော့လဲ မထင်ပါနဲ့။ နာမည်ကြီးဘလော့ဂ်တွေမှာ hit ထောင်နဲ့ သေားနဲ့ ရှိတယ်ဆိုတာ သိပါတယ်။ ဒါပေမယ့် ဒီလိုလုပ်နေတဲ့ပုံက attack လုပ်နေတဲ့ပုံနဲ့ တူနေလို့။ သိတဲ့သူများရှိရင် တစ်ချက်လောက် ရှင်းပြပေးပါလား။ ကျေးဇူးတင်ပါတယ်။ :-( ~sigh~
[P.S. ဒီပို့စ်ရေးပြီး တစ်ပါတ်အတွင်းမှာ stats တွေ ပုံမှန် ပြန်ဖြစ်သွားပါတယ်။]

ဆရာစားချန်တယ်ဆိုတာ

ဒီကနေ့ ရုံးက မန်နေဂျာ ပြောတဲ့ စကားလေးတစ်ခွန်းကို သဘောကျလို့ပါ။ သူကမေးတယ်။ တရုတ်ကွန်ဖူးလောက ဘာလို့ မှေးမှိန်သွားသလဲ သိလားတဲ့။ မှေးမှိန်သွားမှန်းတော့ သိတယ်။ (သိုင်းကားတွေအရဆိုရင် ရှေးခေတ်တုန်းက သိုင်းလောကဆိုတာ တကယ်ရှိခဲ့မှာဘဲ။) ဘာကြောင့် သိပ်အရှိန်အဝါမရှိတော့သလဲ ဆိုတာ စဉ်းတော့ စဉ်းစား စရာဘဲ။ ဒါနဲ့ သူကပြောတယ်။

“သိုင်းလောကသားတွေက အမြဲ ဆရာစား ချန်ခဲ့လို့ ဘဲ။ သူတို့က သိုင်းကွက် ၁ဝ ကွက် တတ်ထားရင် တပည့်တွေကို အများဆုံး ၉ကွက်အထိဘဲ သင်ပေးပြီး တစ်ကွက်ကို သူတို့ဖို့ ချန်ထားလေ့ ရှိတယ်။ ဒီလိုနဲ့ နှစ်ပေါင်း ကြာလာတော့ ပျောက်ကွယ်လုမတတ် ဖြစ်သွားတာပေါ့။ အမှန်က ဆရာ ၁ဝကွက် တတ်ရင် တပည့်ကို အကုန်လုံးသင်ပေးပြီး ဆရာက နောက် ၁၁ ကွက် မြောက်ကို တတ်အောင် လေ့လာ လိုက်စားနေမှ တိုးတက်တော့ မပေါ့။ ဒါကြောင့် ဒီကနေ့ခေတ်မှာ ကိုယ်သိတာ အားလုံးကို မျှဝေပေးနိုင်ရမယ်။ ကိုယ်ကလည်း အမြဲ တိုးတက်အောင် ကြိုးစား အားထုတ် လေ့လာနေရမယ်။ ”

သူတွေးမိတာလည်း ဖြစ်နိုင်တယ်။ တစ်နေရာရာက ဖတ်ဖူးတာလဲ ဖြစ်နိုင်တယ်။ ဘာဘဲဖြစ်ဖြစ် အတွေးလေးက မှတ်သားစရာ ကောင်းပါတယ်။ ကျမ ဆရာစား ချန်သော ဆရာတွေနဲ့ တွေ့ခဲ့ဖူးပါတယ်။ တတ်သမျှ အားလုံးကို တပည့်တွေကို မျှဝေလိုသော ဆရာများကိုလည်း ရခဲ့ဖူးပါတယ်။

သင်ဆရာ မြင်ဆရာ ကြားဆရာ အားလုံးကို အစဉ်အမြဲ လေးစားလျှက်...

P.S. ထုံးစံအတိုင်း ဘလော့ဂ်ရေးခြင်းကို တစ်ပါတ်လောက် ရပ်ထားပါဦးမယ်။

New Year Mood

New Year	Calendar	Date in Georgian Calendar	Year in calendar
New Year	Georgian Calendar	1st Jan 2008	2008
Islamic New Year (Awal al-Muharram)	Hijri Calendar	9th Jan 2008 7pm	1429 H
Chinese New Year (新年, xing nian)	Agrarian Calendar (農曆)	7th Feb 2008	4706
Myanmar New Year	KawZar Calendar (ကောဇာ သက္ကရာဇ်)	17th April 2008	1370

သို့

ကိုနေဘုန်းလတ်
ဘလော့ဂ်ဂါမောင်နှမတွေအကြား ချစ်ခင်ရင်းနှီးစွာ စနောက်ကြရင်း "မြို့စားကြီးနေဘုန်းလတ်" လို့ နာမည်တွင်ခဲ့တဲ့သူ။ မနှစ်က ဒီလိုနေ့မှာပဲ "လွတ်ကျခဲ့တဲ့မြို့တော်" ဘလော့ဂ်လေးကို သူကိုယ်တိုင် အသက်သွင်းခဲ့တယ်။ ဒီနေ့ တော့ တစ်နှစ်တင်းတင်း ပြည့်သွားပြီပေါ့။ မှတ်မှတ်ရရ သူ ့ ဘလော့ဂ်မှာ ပထမဆုံးတင်လိုက်တဲ့ ပို့စ်နာမည်ကလည်း "လွတ်ကျခဲ့တဲ့မြို့တော်" တဲ့။ လက်တွေ့ဘဝမှာ သူလွတ်ကျခဲ့တဲ့ စာရေးဆရာ၊ ဒါမှမဟုတ် အနုပညာသမားဆိုတဲ့ အမည်နာမတွေအတွက် သူ ့ဘလော့ဂ်ဟာ သစ္စာရှိတဲ့ လူယုံ၊ အစွမ်းထက်တဲ့ လက်နက်၊ အရိပ်ကောင်းတဲ့ ညောင်သစ်ပင်လို အသုံးတော်ခံခဲ့တယ်။ ရက်ပေါင်း ၃၆၅ ရက်အတွင်းမှာ သူ ့မြို့တော်က စာကောင်းစာသန့် ၁၂၂ ပုဒ် မွေးထုတ်ပေးခဲ့ပြီးပြီ။ ဒီစာတွေကြောင့် ဖတ်သူတွေအတွက် သုတပန်းတွေ လန်းလာခဲ့တယ် ၊ ရသလမ်းတွေ ဆန်းလာခဲ့တယ် ၊ ပညာမီးတွေ လင်းပလာခဲ့တယ် ။ သူကတော့ သတိထားမိချင်မှ ထားမိလိမ့်မယ်။

ဘလော့ဂ်ဂါတွေ အတွက် ပထမဆုံးဆိုတဲ့ စကားလုံးတော်တော်များများမှာ သူနဲ့ လွတ်ကျခဲ့တဲ့မြို့တော်လည်း ရင်းနှီးကျွမ်းဝင်ခဲ့တယ်။ ဘလော့ဂ်ပို့စ်တွေကို ပထမဆုံး ပုံနှိပ်မယ့်စာအုပ်အတွက် တက်တက်ကြွကြွနဲ့ သူ အစွမ်းကုန်ကြိုးစားခဲ့တယ်။ စာအုပ်ကိစ္စ ဆွေးနွေးပွဲတိုင်းကိုု မပျက်မကွက်တက်ရောက်ခဲ့သူဟာလည်း သူ တစ်ဦးတည်း ရှိခဲ့တယ်။ နောက်ပြီး ရန်ကုန်မှာ ပထမဆုံးကျင်းပခဲ့တဲ့ Blog Day Seminar အတွက်လည်း သူ ပါဝင်ခဲ့တယ်။ MRTV4 နဲ့ အခြားသော မီဒီယာတွေအကြားမှာ ဘလော့ဂ်လောက အကြောင်းကို သူချပြရဲခဲ့တယ်။ ဝေဖန်မှုတွေကို လက်ခံခဲ့တယ်။ မေးခွန်းတွေကို အပြုံးနဲ့ ဖြေကြားပေးနိုင်ခဲ့တယ်။

မြန်မာဘလော့ဂ်ဂါရပ်ဝန်းမှာ ဓလေ့ထုံးတမ်းတစ်ခုရှိတာက ဘလော့ဂ်တစ်ခု ဒါမှမဟုတ် ဘလော့ဂ်ဂါတစ်ယောက်ရဲ့ အထိမ်းအမှတ်နေ့တွေမှာ အထူးရေးသားတဲ့ ပို့စ်တွေ တင်တတ်ကြတယ်၊ သူငယ်ချင်းတွေက လာနှုတ်ဆက်ကြတယ်၊ Comment တွေ ချီးမြှင့်ကြတယ်။

ဒီနေ့ သူ့ရင်နဲ့ တည်ထားတဲ့ မြို့တော်ကြီး တစ်နှစ်ပြည့်တယ်။ ခုလိုအချိန်မှာ သူသာ လွတ်လွတ်လပ်လပ်ရေးသားခွင့်ရမယ်ဆိုရင် သူ့ဘလော့ဂ်အတွက် အထိမ်းအမှတ်ပို့စ်တင်မယ့် အစီအစဉ်ရှိမယ်ဆိုတာ အသေအချာပဲ။ ဒါပေမယ့် သူ … ဘယ်မှာလဲ ။ သူရေးမယ့် ပို့စ်မှာ Comment ရေးဖို့ ဘလောဂါ့ရပ်ဝန်းက သူငယ်ချင်းတွေ သူ့ရဲ့ စာဖတ်ပရိသတ်တွေ မျှော်လင့်တကြီး စောင့်နေကြတယ်။ " မြို့စားကြီး " လို့ စနောက်ကြဖို့ စောင့်နေကြတယ် … ဇန်နဝါရီ ၂၉ ကတည်းက ခြောက်သွေ့နေခဲ့ရတဲ့ သူ ့မြို့တော်မှာ အပြုံးတွေနဲ့ ဖုံးလွှမ်းနေစေချင်တာ … ရယ်သံတွေနဲ့ စည်ညံနေစေချင်တာ … ဒါတွေအတွက် အားလုံးက စောင့်မျှော်နေဆဲပါ ..။

ဘလော့ဂ်ဂါတွေကို ချစ်ကြည်စေချင်တဲ့ သူ့အတွက်၊ လူငယ်တွေကို ကောင်းစေချင်တဲ့ သူ ့အတွက်၊ တိုင်းပြည်ကို တကယ်ချစ်တဲ့ သူ ့အတွက် ဘေးဒုက္ခဆိုတာ မြူတစ်မှုန်စာတောင် ကျရောက်မလာစေဖို့ ဘလောဂါ့ရပ်ဝန်းမှ ညီအကိုမောင်နှမအားလုံးက ဒီအမှတ်တရ ပို့စ်လေးနဲ့ ဆုတောင်းလိုက်ပါတယ်။

U-Thant

Name: U-Thant
Nationality: Myanmar
Date of birth: 22 Jan 1909
Affiliation: Third Secretary General of UN (30 November 1961 – 31 December 1971)
Memorials:

1. U Thant Peace Award
2. Jalan U Thant (Kuala Lumpur, Malaysia)
3. U Thant island (East River, New York)

More about U-Thant (Link, Wikipedia)

ဒီနေ့ သွားရင်းလာရင်း Jalan U-Thant ကနေ ဖြတ်တော့ သတိရသွားလို့ပါ။ မြန်မာလို ဦးသန့်(သူတို့အခေါ် ယူသန့်။ Jalan ဆိုတာ မလေးရှားစကားနဲ့ လမ်းကို ခေါ်တာ။ ) ဒီနေ့ အကြောင်းတစ်ခုခုကြောင့် အဲဒီလမ်းမှာ သုံးလေးပါတ်လောက်ပါတ်နေတော့ သတိမရဘဲ မနေနိုင်ဖြစ်သွားတာ။ ပြီးတော့ အဲဒီ အနီးအနားတစ်ဝိုက်မှာဘဲ U-Thant Residences ဆိုပြီး construction site တစ်ခုကိုလည်း တွေ့လိုက်တယ်။ ဒါပေမယ့် အဲဒီအနီးအနားတစ်ဝိုက်က လူတွေကိုမေးကြည့်။ ၁၀ဝ မှာ ၉၉ ယောက်က ဦးသန့်ဘယ်သူလည်း မသိကြဘူး။ သူငယ်ချင်းတစ်ယောက်ပြောပြတာကို သွားသတိရတယ်။ တစ်ခါက နိုင်ငံတကာ ဉာဏ်စမ်း ပြိုင်ပွဲရှိတယ်တစ်ခုမှာ final round ရောက်တော့ U-Thant ဆိုတာ ဘယ်နိုင်ငံကလဲဆိုတဲ့ မေးခွန်းကို ဘယ်သူမှ မဖြေနိုင်ကြဘူးတဲ့။ တစ်ယောက်ကတော့ တော်တော်လေး စဉ်းစားလိုက်ပြီးတော့မှ အိန္ဒိယကလို့ ဖြေသတဲ့။ တော်တော်ခက်တဲ့မေးခွန်းတွေဖြေပြီး final round တက်သွားပြီး အဲဒီမေးခွန်းရောက်မှ ထစ်သွားကြတယ်။ ဟုတ်တော့ ဟုတ်ပါတယ်။ ကိုယ့်ကို ဘန်ကီမွန်း၊ ကိုဖီအာနန်၊ ဘူးထရို့စ်ဂါလီ မတိုင်ခင်က လူရဲ့ နာမည် လာမေးလဲ သိမှာတော့ မဟုတ်ဘူး။ Jalan U-Thant ကနေ စတဲ့ ဇာတ်လမ်း အဲဒီမှာဘဲ ပြန်အဆုံး သတ်ရမယ်။ ဒီ ဂျလန် ဦးသန့် ဆိုတာ ကမာ္ဘပေါ်မှာ ဦးသန့်ကို ဂုဏ်ပြုမှည့်ခေါ်ထားတဲ့ သုံးခုတည်းသော အမှတ်တရထဲက တစ်ခုပေါ့။ ဘာရယ် မဟုတ်ပါဘူး။ ဒီလိုဘဲ ရှာကြံပြီး ဂုဏ်ယူရတယ်ကွယ်။

TELEMARKETER

I really dislike telemarketing. I have no idea how the telemarketers get my hand phone number, do they just randomly pick up and arrange any 7 digits? Usually I would try at my wits end to avoid them.

This morning, I received a call from an unknown number.

Caller: 请问你会讲华语吗? (Can you speak Mandarin? –she asked in Chinese-)
Me: No I can’t.
Caller: Okay, sorry. Thank you.

I perceived the call was from a telemarketer thus I try to avoid it. But to rethink back, doesn't the conversation sounds a bit funny? She should have had been confused that if I don’t know Mandarin, then why would I answer “No”. It’s just like someone ask you “Are you asleep?” and you answer “yes”. -lol-

Last Saturday

I attended a friend’s wedding at Shah Alam last Saturday. Since I knew both the bride and the groom, I decided to go though I never know how to go to Shah Alam. This cute little bride has written a ‘how to’ for getting there when she gave me the invitation card. The reception was from 12:00 - 4:00pm. I budgeted that I would arrive there around 1:30PM. Requested a friend to accompany me, we set out for LRT around 12:00 noon.

Unexpectedly, the train halted suddenly somewhere near nowhere of Wangsa Maju station. After about half an hour, it started moving at a speed of a tortoise with sudden breaks whenever it wanted and taking rest about 5 minutes at each station. I was just worried that the food is going to finish. (not kidding  ) Luckily, we arrived at the reception around 3:00PM, greeted the bride and the groom then rushed for food.

Heartiest congratulations to Naufal and Hasnah!! Tahniah kepada Naufal dan Hasnah, semoga berkekalan hingga ke akhir hayat.

This is my first time ever attending a (pure) Malaysian wedding. But couldn't able to get a full picture of Malay customs since i get there quite late. Met a few friends, chit chatted, observed the people around, time came to go back. We took a cab to the Shah Alam KTM station. Then, another problem started here. After the driver drove for a few minutes, he started saying that he didn’t know the way since he drove a passenger from KL to Shah Alam. The driver was hoping that I would tell him how to go. How am I supposed to know? Just imagine how I get back to KL with my poor Bahasa Melayu with his hard to understand BM.

Do{
Drive();
Stop();
askDirectionFromPeopleAtBusStop();
found = foundTheWay();
}while(found != ‘y’);

After going through that loop for about 5 times, he got exhausted. Then he started asking people the way to KL Central. The driver offered to send us to KL Central Station by RM20. We agreed for RM 17 after bargaining. With worries on all the way back, we get back to KL finally. Huhuuuuuuuuuuuuu…… What an exciting day!

credits: photo from Humaimee

IT and Gender

IT and Gender ဆိုတဲ့ topic ကို အမြဲ တွေ့နေရတယ်။ IT field ကို စဝင်ကတည်းက သူငယ်ချင်းတွေ ဆရာတွေ အမြဲ ပြောနေကြပေါ့။ အစတုန်းကတော့ ကျမ လက်မခံနိုင်ခဲ့ဘူး။ မိန်းကလေးတွေကို ယောကျာ်းလေးတွေလောက် မတော်ဘူး၊ IT field မှာ ဝင်ဆံ့ဖို့ မလွယ်ဘူး လို့ ပြောတာလောက် မုန်းတာ မရှိခဲ့ဘူး။ အရင်တုန်းကပါ။ အခုတော့လည်း လက်ခံသင့်သလောက်တော့ လက်ခံနိုင်ခဲ့ပါပြီ။

ကျမ Computer Science ကို လေးနှစ်တက်ခဲ့တယ်။ (ကျောင်းပြီးတာ မနေ့တစ်နေ့ကပေါ့။) အမြဲလည်း စဉ်းစားခဲ့တယ်။ IT field မှာ ကျွမ်းကျင်မှုက Gender နဲ့ ဆိုင်သလားဆိုတာပေါ့။ ကျမကို သင်ခဲ့တာ ဆရာမထက် ဆရာအရေအတွက်က ပိုများလိမ့်မယ်လို့ ထင်တယ်။ တော်တဲ့ ဆရာမတွေ ရှိပါတယ်။ ဒါပေမယ့် အများအားဖြင့် စာတွေ ဖတ်ပြနေတာဘဲ များတယ်။ ဆရာတွေလောက် လက်တွေ့ပိုင်းမှာ သိပ်မသင်ပေးနိုင်ဘူး။ စာအတူလုပ်၊ assignment, project အတူလုပ်ခဲ့ဖူးတာလည်း မိန်းကလေး သူငယ်ချင်းထက် ယောကျာ်းလေး သူငယ်ချင်းက ပိုများတယ်။ ယောကျာ်းလေးတွေက စာသာ မရရင်နေမယ်။ လက်တွေ့ပိုင်းမှာတော့ အမြဲတမ်း မိန်းကလေးတွေထက်သာတယ်။ မိန်းကလေးတွေက သင်ရိုးညွှန်းတမ်းကို ကျေအောင် ထိုင်ဖတ်နေတဲ့ အချိန်မှာ သူတို့က စာနဲ့ မဆိုင်တဲ့ technology အသစ်တွေကို စမ်းသပ်နေမယ်။ စိတ်ဝင်စားတာ တစ်ခုခုတွေ့ပြီဆိုရင် မပြီးမချင်း မစားမသောက်၊ စာမေးပွဲ ကျချင်ကျဆိုပြီး သူတို့ စိတ်ဝင်စားတာကိုပြီးအောင် လုပ်လိမ့်မယ်။ ကျမတို့တော့ အဲလိုဘယ်လုပ်နိုင်ပါ့မလဲ။ စာမေးပွဲကျမှာကို ကြောက်ရတာနဲ့ အမှတ်များချင်ရတာနဲ့ တစ်ခြားစိတ်ဝင်စားတာတွေကို လှည့်မကြည့်နိုင်ဘူးဖြစ်နေတာ။ ဉာဏ်ကလည်း တော်တော်ကောင်းကြတယ်။ စာမေးပွဲအတွက် ကျမတစ်ပါတ်လောက် ကျက်ရတဲ့ စာကို သူတို့တွေက တစ်ရက်တည်းနဲ့ ပြီးအောင် ကျက်ကြတယ်။ လေးစားပါတယ်။

နောက်ပြီး အံ့ဩသွားတာက တစ်ရက်ကပေါ့။ design project presentation မရောက်ခင် တစ်ရက်အလို မိန်းကလေးတွေအားလုံး ဒီဇိုင်းလုပ်ဖို့ အလုပ်ရှုပ်နေတဲ့အချိန်မှာ ကိုယ်တော်ချောတွေက ဘာလုပ်နေတယ်ထင်လဲ။ Adobe Photoshop CS3 နဲ့ လုပ်ချင်လို့ RapidShare ကနေ download လုပ်ပြီး crack ထိုင်ရှာနေတယ်။ project ပြီးပြီး မပြီးပြီး သူတို့က သိပ်ဂရုစိုက်တာ မဟုတ်ဘူး။ လုပ်ချင်တာ လုပ်ရရင် ပြီးရော။

နောက်တစ်ခုက conversation.. ကျမသတိထားမိသလောက် မိန်းကလေးတွေရဲ့ conversation မှာ latest technology အကြောင်းတွေ မပါသလောက်ကို ရှားတယ်။ IT ကျောင်းသူအချင်းချင်းတွေ့ရင်တောင် အားလို့ မပြောကြဘူး။ ယောကျာ်းလေးတွေကြတော့ မဟုတ်ဘူး။ တစ်ယောက်ယောက်က တစ်ခုခု သိပြီဆိုတာနဲ့ ပြောကြဆိုကြ ငြင်းကြ ခုံကြပြီ။ အဲဒါ ဘယ်လို ခေါ်မလဲ။ သဘာဝလို့ဘဲ ခေါ်မလား။

နောက်… IT ကျောင်းသူ အများစုက windows ကို format ချရမှာ သေမလောက် ကြောက်နေကြတဲ့ အချိန်မှာ ယောကျာ်းလေးတွေက windows format ချတာ မပြောနဲ့ dual boot သွင်းတာတောင် game ကစားသလောက် ခက်တယ်လို့တောင် မမှတ်ကြဘူး။ windows crash ဖြစ်သွားရင် မိန်းကလေးတွေက ကမာ္ဘပျက်မလောက် ဝမ်းနည်းနေတဲ့ အချိန်မှာ သူတို့ကတော့ အေးဆေးဘဲ။ crash ဖြစ်တော့လည်း အသစ်သွင်းတာပေါ့တဲ့။

ပြီးတော့ ကျမတို့တွေ final year project ကို ကုန်းရုန်းပြီး လုပ်နေတဲ့ အချိန်မှာ အတန်းထဲက ကျောင်းသားတွေက windows ကို Mac ပုံစံထွက်အောင် effect ထည့်ရတာနဲ့ SUSE တို့ Windows XP တို့မှာ Vista လို Aero effect ရအောင် ပြောင်းနေတာနဲ့ အချိန်ကုန်နေတယ်။ တကယ်လည်း presentation ရောက်ရော စာနဲ့ဆိုင်တာကော မဆိုင်တာကော ထည့်ပြောပြီး အမှတ်တွေ အများကြီး ရသွားကြတယ်။

IT field မှာ ဘာလို့ ယောကျာ်းလေးတွေ ပိုပြီးအောင်မြင်နေရသလဲဆိုတော့ သူတို့က လုပ်ချင်တာကို ဦးစားပေးပြီး ကျမတို့တွေက လုပ်သင့်တာကို ဦးစားပေးနေလို့ လို့ဘဲ conclusion ဆွဲလိုက်ရမယ်ထင်ပါတယ်။ အဲဒါဘဲ ကောင်းပါတယ်။ အားလုံး လုပ်ချင်တာတွေ တူနေရင် လောကကြီးက မမျှတဘဲ တစ်ဘက်စောင်းနင်း ဖြစ်သွားမှာပေါ့။

(ယောကျာ်းလေးတိုင်း တော်သည် လို့ မပြောချင် သလို မိန်းကလေးတိုင်း မညံ့ပါ။ general အရ ပါတ်ဝန်းကျင်မှ လူများကို အခြေခံပြီး ကျမအမြင်ပါ။)

Installation ceremony for 13th king

၂၆ ရက်နေ့ (ကြာသပတေးနေ့) က မလေးရှားရဲ့ public holiday ပါ။ ဘာကြောင့်လဲဆိုတော့ ဘုရင် အသစ်တက်လို့ပါ။ မလေးရှားမှာ ပြည်နယ် ၁၄ခုရှိတဲ့ အနက် ပြည်နယ် ၉ခုမှာ အခုထိ ဘုရင် တွေအုပ်ချုပ်ပါသေးတယ်။ သူတို့ကတော့ Sultan လို့ ခေါ်ပါတယ်။ အဲဒီ ဘုရင် ၉ပါးထဲကမှ ငါးနှစ်တစ်ကြိမ် တစ်ပါးစီ အလှည့်ကျ အကြီးဆုံး ဘုရင် အဖြစ် တင်ပါတယ်။ အဲဒီ ဘုရင် အကြီးဆုံးကိုတော့ Agong လို့ ခေါ်ပါတယ်။ အခုတစ်နှစ် Agong အဖြစ် အလှည့်ကျသူကတော့ Terangganu ပြည်နယ်ရဲ့ Sultan ပါ။ ဘာရယ်တော့ မဟုတ်ပါဘူး။ ဘုရင် အသစ်တက်တဲ့ ပွဲကို သုံးလိုက်တဲ့ term လေးကို အံ့ဩလို့ပါ။ “being installed as 13th Agong” ၊ “installation ceremony of the king” တဲ့။ တကယ်ပါ။ ဘုရင်ကိုလည်း install လုပ်ရတယ်ဆိုတာ အခုမှသိလိုက်တာ…
Full article..

Tagged game pool ထဲ ပါခဲ့ရပြန်တယ်

ဒီရက်ပိုင်း မြန်မာ ဘလော့ဂါတွေ tag တမ်း ကစားနေကြပါတယ်။ ကျမလည်း လမ်းလျှောက်ရင် ခြေထောက်ကို တည့်တည့်ထားမှ လျှောက်လို့ရတဲ့ ကိုရန်အောင်၊ ရှမ်းပြည်ကိုကြိုက်တယ်ဆိုတဲ့ ကိုချမ်းမြစိုး နဲ့ ညီမလေးရဲ့ တိုတို တို့ ရဲ့ tag ခြင်းခံလိုက် ရပြီးသကာလ ကိုယ့်ရဲ့ ပုံမှန် မဟုတ်တဲ့ အကျင့်တွေကို ရေးချရန် အကြောင်းဖန်လာပါတော့တယ်။ လူတစ်ကိုယ် စရိုက်တစ်မျိုးပေါ့နော်။

၁၀။ အစားစားတာကနေ စရေးရတော့မှာဘဲ။ တစ်နေ့တစ်နေ့ အများဆုံးလုပ်နေတဲ့ အလုပ်ဆိုတော့။ =) ကျမဟာ အစားဂျီးများတဲ့သူ လုံးဝမဟုတ် ရပါဘူး။ ဒါပေမယ့် ကျမ လုံးဝမကြိုက်တဲ့ ကြက်သွန် family ဝင်တွေက ဟင်းတိုင်းမှာ ပါနေတော့ ကွိုင်ဘဲ။ ကြက်သွန်နီ၊ ကြက်သွန်ဖြူ၊ ကြက်သွန်မြိတ်၊ နံနံပင်၊ ငရုတ်သီး စတဲ့ ဟင်းထဲမှာ ရှုပ်နေတဲ့ အရာတွေ အားလုံးကို လုံးဝစားလို့ မရဘူး။ ဒီတော့ နေ့တိုင်းလိုလို ထမင်းမစားခင် အရင်ဆုံးလုပ်လေ့ ရှိတာကတော့ ဟင်းထဲကနေ မစားတဲ့ အရာတွေကို ဆယ်ထုတ်ပါတယ်။ အားလုံးရှင်းသွားမှ စားပါတယ်။ ခေါက်ဆွဲ စားရင် ဆယ်ယူရေး အချိန် နည်းနည်း ပိုကြာတာပေါ့။ ကိုယ့်ဟာနဲ့ကိုယ်တော့ ဟုတ်နေတာဘဲ။ ဒါကို ဘေးကလူတွေကတော့ ကြည့်လို့ မရကြပါဘူး။ သူငယ်ချင်းတွေကတော့ ကျမကို ဆယ်လွန်းလို့ ကယ်ဆယ်ရေးဌာနမှာ အလုပ်လုပ်ပါလားတဲ့။

၉။ နောက်တစ်ခုလည်း အစားနဲ့ ပါတ်သက်တာဘဲ။ လူတွေ အရမ်းစားတဲ့ ချော့ကလက်ကို ကျမ လုံးဝမကြိုက်တာဘဲ။ ချော့ကလက်စားရင် stress ကျတယ် လို့တော့ ကြားဖူးတယ်။ ကျမကတော့ အဲဒီ ချော့ကလက်ကို စားလိုက်ရင် မရှိတဲ့ stress တွေ ဝင်လာတယ်။ သူငယ်ချင်းတွေကလည်း တွေ့ရင် ချော့ကလက်၊ ချော့ကလက် ရေခဲမုန့်၊ ချော့ကလက် ချိုချဉ်၊ ချော့ကလက် ဝေဖာ၊ ဒါတွေဘဲ စားမလားလို့ လာလာမေးတော့ မကြိုက်ဘူးလို့ ဖြေရင်ဘဲ အူကြောင်ကြောင် လူတစ်ယောက်လို့ အမြဲ အထင်ခံနေရပါတယ်။

၈။ အစားတွေချည်း ဖြစ်နေပြီ။ အခု တစ်ခုကတော့ ကိုယ့်ကိုကိုယ် ပြုပြင်သင့်တဲ့ အကျင့်လို့တော့ သတ်မှတ်ထားပါတယ်။ အသီးအနှံတွေကို အခွံခွာပြီးမှ စားပါတယ်။ ပန်းသီး၊ သစ်တော်သီး အခွံကတော့ လူတိုင်းခွါတာပေ့ါလို့ ဆိုရင် ကျမက ပိုခွာပါတယ်။ လိမ္မော်သီးဆိုရင် အမွှေး တစ်မျှင်မှ မကျန်အောင် ရှင်းမှ စားလို့ ဝင်ပါတယ်။ ဆိုးတာက စပျစ်သီးကို အခွံ ခွာမှ စားပါတယ်။ ဒါတော့ဆိုးတယ်။ လူအများနဲ့စားရင် ငတ်တာ များတယ်။ ကျမ သုံးလုံးလောက် စားပြီးရင် အားလုံး ပြောင်ပြီ။ မခွာရင်လည်း လုံးဝ စားလို့ မရလို့။ ဒုက္ခ.. ဒုက္ခ..

၇။ ညအိပ်ရင် ခေါင်းအုံး နှစ်လုံး မရှိရင် လုံးဝအိပ်လို့ မရဘူး။ ဖက်လုံးတော့ မကြိုက်ဘူး။ အဲဒါကြောင့် ခေါင်းအုံး သုံးလုံး ဝယ်ထားတယ်။ တစ်လုံးက သူများ လာငှားရင် ပေးဖို့။ မဟုတ်ရင် သူငယ်ချင်းတွေ လာငှားတဲ့ နေဆို အိပ်လို့ မရလို့..

၆။ ညညဆို အသံတွေ ကြားနေသမျှ လုံးဝ အိပ်လို့ မရတာ အဆိုးဆုံး ရောဂါပါ။ ဘယ်လောက် အသံတိုးတိုး နားက ကြားနေရော.. အဆောင်မှာနေတော့လည်း လူအမျိုးမျိုး… ညည ရုပ်ရှင် ထကြည့်တဲ့ roommate.. ညည ဖုန်းပြောတဲ့ roommate.. ဒါကြောင့်ဘဲ လူတွေ တော်တော်များများနဲ့ ရန်ဖြစ်ခဲ့ရဖူးတယ်။ ဒီတော့ လူတွေ အားလုံး အိပ်သွားမှ အိပ်ဖြစ်တော့ ညစောစောမအိပ် မနက်စောစောမထတဲ့ အကျင့် ရသွားတာဘဲ။

၅။ စာကျက်ရင်လည်း ပါတ်ဝန်းကျင် တစ်ခုလုံး တိတ်ဆိတ်နေမှ ကျက်လို့ရတယ်။ ဒါကြောင့် အဆောင်မှာနေတာထက် ခိုက်ခိုက်တုန်အောင် အေးပေမယ့် တိတ်ဆိတ်တဲ့ library ကိုရောက်နေတာက ပိုများပါတယ်။ မှတ်မိသေးတယ်။ ကျမ ၁ဝတန်းဖြေတုန်းက တစ်အိမ်လုံး စကားတိုးတိုးပြောပြီး အသံတိတ် ရုပ်ရှင်ကြည့်တတ်တဲ့ အကျင့် ရသွားကြသေးတယ်။

၄။ တစ်ရက်ကို ၈နာရီပြည့်အောင် အိပ်လေ့ရှိတယ်။ အိပ်ရေးပျက်သွားရင် နောက်နေ့ အစားထိုး ပြန်အိပ်တယ်။ အခုတော့ အိပ်ချိန်ကို တတ်နိုင်သမျှ လျှော့နေပါတယ်။

၃။ တစ်ချို့တွေက ကျမကို အရမ်းစကားများတဲ့ ကောင်မလေးတဲ့။ တစ်ချို့ကြပြန်တော့လည်း အရမ်းအေးလို့တဲ့။ ဒီမှာတင် personality နှစ်မျိုးဖြစ်နေပြီ။ စိတ်ပေါက်ရင် ပေါက်သလို နေပါတယ်။ တစ်ခါတလေ ပေါကြောင်ကြောင်နေပြီး တစ်ခါတစ်လေတော့ ပညာရှိဂိုက် ဖမ်းတတ်ပါတယ်။

၂။ ဆေးထိုးအပ်ကို သူမတူအောင် ကြောက်ပါတယ်။ အခုထိဘဲ…

၁။ အနေအထိုင်ကတော့ ဆင်မယဉ်သာပါဘဲ.. ကိုယ့်ခြေထောက်ထက်ကြီးတဲ့ ဖိနပ်နဲ့ မြေလူးနေတဲ့ ဘောင်းဘီမျိုးကို အရမ်းကြိုက်ပြီး ကားယား ကားယား လမ်းလျှောက်နေတာတွေ့ရင် လှမ်းသာ ခေါ်လိုက်ပါတော့။ လူမမှားစေရဘူး…

ကိုရန်အောင် ပြောသလို DV များ ပေါက်မလားလို့ မနည်းစဉ်းစားရေးလိုက်ရတယ်။ ၁ဝချက်တော့ ပြည့်သွားသားဘဲ။ ပုံမှန်ဟုတ်သော အမူအကျင့်များ ကို ရေးခိုင်းရင်တောင် ၁ဝချက်ပြည့်မှာ မဟုတ်ဘူးလို့ doubt ဖြစ်လာပြီ… =)

ကိုယ် ခံထားရတော့ မထူးဘူးဆိုပြီ်း ဆက် tag ပါ့မယ်။ ကံထူးရှင်တွေကတော့
၁။ မောင်သန့်ဇင်
၂။ မောင်စေတန်ဂေါ့ဒ်
၃။ အိမွန်စိုး

ကဲ… အားလုံးက ကျောင်းသားတွေဆိုတော့ စာပိနေတယ်လို့ အကြောင်းပြရင် စာပိုပိသွားမယ်နော်။ (စာနဲ့ခြောက်မှဘဲ ရမယ့်ပုံဘဲ။) ဤစာဖတ်မိပြီး တစ်ပါတ်အတွင်း အကောင်အထည် ဖော်ကြပေလော့။

နှစ်ခုရွေးပါ

“Fast, cheap, good – choose any two.”

အရင် ငါးလ attachment ဆင်းတုန်းက ကျွန်မရဲ့ supervisor – chief ပရိုဂရမ်မာကြီးရဲ့ လက်စွဲတော် စကား တစ်ခွန်းပါ။ (သူ့ရဲ့ email signature ဆိုရင် ပိုမှန်ပါမယ်။) customer တွေက demand များလွန်းလို့တဲ့။

စိတ်ညစ်ဖို့ကောင်းတဲ့သတင်း

ပြောရဦးမယ်။ တော်တော် စိတ်ညစ်ဖို့ကောင်းတဲ့ သတင်းတစ်ပုဒ်။ အရင်တစ်ပါတ် တနင်္လာနေ့ကပေါ့(မတ် ၂၆)။ အဖိုးကြီး တစ်ယောက်က ဟောင်ကောင်မင်းသား Andy Lau (Liu De Hua) ကို အရမ်းကြိုက်တဲ့ သမီးကြောင့် ရေထဲခုန်ချပြီး suicide လုပ်သွားတယ်တဲ့။
သူ့သမီး Andy Lau ကို တတိယ အကြိမ် တွေ ့ဖို့အရေး သူ့မှာ အိမ်တွေဘာတွေ ရောင်းပြီး မြို့တက်လာပါရော။ အဲဒါကို သူ့သမီးက မင်းသားနဲ့ ခဏလေးဘဲ တွေ ့ပြီး ဓာတ်ပုံဘဲ ရိုက်လိုက်ရလို့ အဖိုးကြီးက မကျေမနပ်နဲ့ ကိုယ့်ကို သတ်သေသွားတာ။ (မဟုတ်ရင်လည်း သူ့မှာ သူ ့သမီးကို ရောင်းပြီးပေးစရာ ဘာမှ မကျန်တော့လို့။ ကျောက်ကပ်တစ်ဖက်ကိုတောင် သွားရောင်းဖို့ ကြိုးစားသေးတယ်ဆိုဘဲ။) တော်တော် စိတ်ညစ်ဖို့ကောင်းတယ်။ အဖေကော သမီးကော။ ဒါတောင် အဖေက အငြိမ်းစား ကျောင်းဆရာ။ သူ ့သမီးကိုတောင် နိုင်အောင် ဘာလို့ မဆုံးမနိုင်ရတာလဲ မသိပါဘူး။ သူ ့အမေက ပါသေးတယ်။ သူ ့ယောကျာ်း သေရတာဟာ Andy Lau ကြောင့်လို ့မီဒီယာ ကို ကြေငြာတယ်။ မင်းသားခမျာ သနားစရာ။
သူ့လိုမျိုး မင်းသားရူးရူးတဲ့ သူတွေ အကြောင်းကို sina.com က minisite တစ်ခု တောင် ဖွင့်ပြီး ရေးပြထားတယ်။
မလွယ်ပါလားနော်။

မပြီးဆုံးနိုင်သော

UAT - User Acceptance Test
စစချင်းတော့ UAT 1 တဲ့။ ပြီးတော့ UAT 2 တဲ့။ နောက် Final Acceptance Test။ အခုလာပြန်ပြီ installation and training။ အကြိမ်တိုင်း ထွက်လာတဲ့ bugs တွေ fix လုပ်ရတာ စိတ်ညစ်လာပြီ။ ဒီတစ်ပါတ်အတွင်း အပြီးလုပ်ပါ ဆိုဘဲ။ တစ်ချက်လွတ်အမိန့်။ additional requirement တွေကလည်း တစ်ချိန်လုံး ထပ်ထည့်နေတယ်။ ၃ပါတ်လေးဘဲ ကျန်တာကို အလွတ်မပေးကြဘူး။
ဒါကတော့ Extreme Programming Model (XP) ရဲ့ အားနည်းချက်ပါဘဲ။ ပြီးတော့ accounting software ဆိုတော့ ကိုယ်က ဂျာနယ်၊ လယ်ဂျာ ဆိုတာတွေကို အီလည်လည်၊ customer တွေကလည်း လိုအပ်ချက်ကို ရှင်းရှင်းလင်းလင်း မပြောနိုင်တော့ ထင်သလို ရေးလိုက်တယ် ပြီးတော့ပြန်ပြင်တယ်၊ ရေးပြင် ဆော့ဖ်ဝဲကြီး ဖြစ်နေတော့တာပေါ့။
စိတ်ညစ်လာလို့ ပို့စ်ထတင်လိုက်တာ။ နောက်မှဘဲ trainee ကျောင်းသားတစ်ယောက်ဧ။် ဘဝအတွေ ့ ့အကြုံဆိုပြီး ရေးဦးမယ်။
ဒီတစ်ပါတ်တော့ ဘလော့ဂ်ကို တာ့တာ ခန လုပ်ထားပါ့မယ်။ သူတို့ခိုင်းတာတွေ ပြီးအောင်လုပ်လိုက်ဦးမယ်။ တနလာင်္နေ့ကြရင် presentation လုပ်ရဦးမယ်။ ရုံးကလူတွေကတစ်မျိုး၊ ကျောင်းက ဆရာမက တစ်မျိုးနဲ့၊ ရူးချင်လာပြီ။ Wish me luck!!

ဖြေကြည့်ကြမယ်

ကိုယ့်ရဲ့ general knowledge ကို တစ်မိနစ်လောက် အချိန်ယူပြီး test လုပ်ကြည့်ပါလား။
ကဲ… စပြီနော်။

1) How long was the 100 year war?
A) 116
B) 99
C) 100
D) 150

အူကြောင်ကြောင်ပါလားလို့ မထင်လိုက်ပါနဲ့။ ကဲ.. ဆက်ဖြေကြည့်ပါ။

2) In which country are the Panama hats made?
A) BRAZIL
B) CHILE
C) PANAMA
D) EQUADOR

ငါ့ကို ကလေးများထင်နေသလား လို့များ တွေးနေသလား။ ဆက်ဖြေကြည့်ပါဦး။

3) In which month do the Russians celebrate the October Revolution?
A) JANUARY
B) SEPTEMBER
C) OCTOBER
D) NOVEMBER

ဒါလေးများ…ဆိုပြီးလုပ်နေရင် နောက်တစ်ခုထပ်ဖြေကြည့်ပါ။ အဖြေကို မှတ်ထားဦးနော်။ ပြီးရင် အဖြေတိုက်လို့ရအောင်။

4) Which of these was King George VI first name?
A) EDER
B) ALBERT
C) GEORGE
D) MANOEL

ကဲ.. ဒါနောက်ဆုံးဘဲ…ဖြေလိုက်ပါဦး။

5) The Canary islands, in the Pacific Ocean, has its name based on
which animal?
A) CANARY BIRD
B) KANGAROO
C) PUPPY
D) RAT

ကဲ.. ပြီးရင် အဖြေတိုက်ကြမယ်။ comment ထဲမှာ အဖြေတွေရှိတယ်နော်။