စာအုပ်အညွှန်း - Deception Point

Digital Fortress ဖတ်ပြီးကတည်းက Dan Brown ရဲ့ အရေးအသားကို အရမ်းကြိုက်သွားခဲ့တယ်။ ဒုတိယ အနေနဲ့ Deception Point ကို ဖတ်ဖြစ်တယ်။ Digital Fortress လိုမျိုးတော့ လက်က မချချင်လောက်အောင် မဖြစ်ပေမယ့် သူလည်း တော်တော် စိတ်ဝင်စားဖို့ကောင်းတဲ့ ဇာတ်လမ်းဇာတ်အိမ်နဲ့ပါဘဲ။ နိုင်ငံရေး၊ သိပ္ပံနဲ့ နည်းပညာ၊ သမိုင်း၊ ဘူမိဗေဒ၊ အဏ္ဏဝါ သိပ္ပံ စသဖြင့် ဘာသာရပ်ပေါင်းစုံနဲ့ ဇာတ်အိမ်တည်ထားပြီး ရသပေါင်းစုံ ဗဟုသုတပေါင်းစုံ ပေးနိုင်တဲ့ စာအုပ်တစ်အုပ် ပေါ့။

ဇာတ်လမ်းအကျဉ်းကတော့ အမေရိကန် ပြည်ထောင်စုမှာ သမ္မတ ရွေးကောက်ပွဲ လုပ်နေတဲ့အချိန်။ အစိုးရဘက်က NASA ကို အပြတ်အသတ် ထောက်ခံပြီး အတိုက်အခံ ပါတီက အစိုးရဟာ NASA နဲ့ ပါတ်သတ်ပြီး ဖြုန်းတီးနေတယ်ဆိုပြီး NASA ရဲ့ အားနည်းချက်တွေကို အဓိက တိုက်ခိုက်တယ်။ NASA ရဲ့ ယခုနှစ်ပိုင်းအတွင်း မအောင်မြင်တဲ့ ပရောဂျက်များစွာကြောင့် တစ်နှစ်တစ်နှစ် NASA ကို ဒေါ်လာ ဘီလီယံပေါင်းများစွာ ထောက်ပံ့နေတဲ့ အစိုးရဘက်က တစ်ဖြည်းဖြည်း အားနည်းလာခဲ့တယ်။ အဲဒီအချိန်မှာ NASA ဟာ မြောက်ဝင်ရိုးစွန်းမှာ သက်ရှိရုပ်ကြွင်းတွေပါတဲ့ ဥက္ကာပျံတစ်ခုကို ရှာဖွေတွေ့ရှိတယ်ဆိုတဲ့ သတင်းထွက်လာတယ်။ ဒါဟာ ကမာ္ဘအပြင်ဘက်မှာ သက်ရှိတွေ နေနိုင်သလား ဆိုတာကို အဓိကထား လေ့လာနေတဲ့ NASA အတွက် တော်တော်ကြီးမားတဲ့ အောင်မြင်မှု တစ်ခုပါဘဲ။ ဒီဥက္ကာပျံနဲ့ သက်ရှိရုပ်ကြွင်းတွေဟာ အစစ်အမှန် ဖြစ်ကြောင်းကို အရပ်သား သိပ္ပံပညာရှင် ငါးယောက်ကို စစ်ဆေးခိုင်းတဲ့အခါမှာ … ဇာတ်လမ်းနာမည်ကိုက Deception Point ဆိုတော့ တစ်ယောက်ယောက်က တစ်ခုခုကို လိမ်နေတာတော့ သေချာတယ်။ ဘာလဲ၊ ဘယ်သူလဲ၊ ဘာကြောင့်လဲ ဆိုတာ သိချင်ရင်တော့ စာအုပ် ငှား/ဝယ် ဖတ်ပါ။ :-D

ဒီဝတ္ထုထဲက အဓိက ဇာတ်ကောင်တွေကတော့

• Rachel Sexton - အတိုက်အခံပါတီ ခေါင်းဆောင်ရဲ့ သမီး၊ NRO ရဲ့ Data Analyst
• Michael Tolland – documentary တင်ဆက်သူ အဏ္ဏဝါ သိပ္ပံ ပညာရှင်
• Corky Marlinson – astrophysicist (မြန်မာလို ဘာခေါ်လဲ?? နက္ခတ္တဗေဒ+ရူပဗေဒ ပညာရှင်?)
• Norah Mangor – တက္ကသိုလ်က အော့ကြောလန် ပါမောက္ခ၊ glaciologist (ရေခဲမြစ်တွေကို လေ့လာတဲ့ ပညာရှင်)
• Wailee Ming - ဘာပညာရှင်လည်း မသိတော့ဘူး။ မေ့သွားပြီ။ နောက်မှ စာအုပ်ပြန်လှန်ပြီး ထပ်ထည့်မယ် :D
• Zach Henry - လက်ရှိ အမေရိကန် သမ္မတ
• Senator Sexton - အတိုက်အခံပါတီ ခေါင်းဆောင်

Dan Brown ရဲ့ အရေးအသားမှာ တကယ်ကြိုက်မိတဲ့ အချက်က သူ့ဇာတ်လမ်းထဲမှာ ဘာသာရပ် တော်တော်များများကို အသေအချာ လေ့လာပြီး အသေးစိတ် ထည့်သွင်းရေးသားထားတာကိုပါ။ Deception Point ထဲမှာဆိုရင်
- အမေရိကန်ပြည်ထောင်စု ရဲ့ ရှုပ်ထွေးလှတဲ့ သမ္မတ ရွေးကောက်ပွဲ အကြောင်း
- နိုင်ငံရေးသမားတွေရဲ့ sex scandal
- အဏ္ဏဝါ သမုဒ္ဒရာ ရေပြင် နဲ့ ငါးမန်းတွေ
- ဘူမိဗေဒဆိုင်ရာ ကျောက်တုံး ကျောက်ခဲတွေ အကြောင်း
- NASA နဲ့ပါတ်သက်ပြီး အာကာသ သိပ္ပံအကြောင်း
- မြောက်ဝင်ရိုးစွန်း အာတိတ်စက်ဝိုင်း ရဲ့ ရေခဲပြင် ဖွဲ့စည်းပုံ၊ ရာသီဥတု
- UFO (ပန်းကန်ပြားပျံ) တွေနဲ့ ဂြိုလ်သားတွေ တကယ်ရှိမရှိ
- အမေရိကရဲ့ ထိပ်သီးအဖွဲ့အစည်းတွေဖြစ်တဲ့ NASA, NRO (National Reconnaissance Office), SFF (Space Frontier Foundation)
- အမေရိကန်စစ်တပ်ရဲ့ အထူးလျှို့ဝှက်အဖွဲ့ဖြစ်တဲ့ Delta force နဲ့ သူတို့သုံးတဲ့ အဆင့်မြင့် တိုက်လေယာဉ်တွေနဲ့ လက်နက်ကိရိယာ
- White House အထဲက တစ်ချို့နေရာတွေကို အသေးစိတ် ရေးထားတယ်

ဝထ္ထုဆိုတော့ တစ်ချို့ အပိုင်းတွေဟာ ဖြစ်ရပ်မှန်တွေကို မှီငြမ်းထားတာ ဖြစ်မယ်။ တစ်ချို့ ဖြစ်ရပ်တွေကတော့ စာရေးဆရာရဲ့ စိတ်ကူးယဉ်မှု သက်သက်သာ ဖြစ်လိမ့်မယ်။ စာရေးသူကတော့ ဇာတ်လမ်းထဲမှာ ပါတဲ့ နည်းပညာတွေဟာ အပြင်မှာ တကယ်ရှိပြီးဖြစ်တယ်လို့တော့ အဖွင့်မှာ ရေးထားတယ်။

Dan Brown ရဲ့ နောက်ထပ်စာအုပ်တွေ ဖြစ်တဲ့ Da Vinci Code နဲ့ Angel & Demons ကိုလည်း ဆက်ဖတ်ဖို့ စဉ်းစားထားတယ်။ Angel & Demons က ရုံတင်တော့မှာဆိုတော့ အဲဒါ အရင် ဝယ်ဖတ်လိုက်ဦးမယ်။ ဖတ်ပြီးမှ ရုံတင်တာ သွားကြည့်ရတာလည်း အရသာ တစ်မျိုးဘဲ။

Digital Fortress နှင့် နောက်ဆက်တွဲ စဉ်းစားစရာများ

Hari Raya ရုံးပိတ်ရက်တွေမှာ မပျင်းလိုက်ရအောင် Digital Fortress က အဖော်လုပ်သွားခဲ့တယ်။ မဂျစ်ရဲ့ Digital Fortress ထဲမျှောပါသွားခြင်း ဆိုတဲ့ ပို့စ်ကို ဖတ်ပြီးကတည်းက အဲဒီ စာအုပ်ကို ဘာကြောင့်လဲမသိ အရမ်း ဖတ်ချင်သွားခဲ့တယ်။ code-breaking တို့ cryptography တို့ဆို အရမ်း စိတ်ဝင်စားတယ်။ chapter တစ်ခုပြီး တစ်ခု ဆက်ဖတ်ချင်အောင် Dan Brown ရဲ့ အရေးအသားတွေက အရမ်းကို ဆွဲဆောင်မှု ရှိလွန်းတယ်။ ကျမက ပုံမှန်ဆို စာအုပ် ထူထူတွေကို ခေါင်းခုအိပ်ဖို့လောက်ဘဲ စိတ်ဝင်စားတာ။ စာဖတ်ဝါသနာ ပါတယ်ဆိုတာ ကာတွန်းနဲ့ ပုံပြင် စာအုပ်ကို ထည့်တွက်မှဘဲ ပြောလို့ ရမယ်ထင်တယ်။ ဒါပေမယ့် Digital Fortress ကို ဖတ်တော့ Dan Brown ရဲ့ အရေးအသား ဇာတ်လမ်း တည်ဆောက်မှု အပေါ်မှာ မျှောပါသွားခဲ့တယ်။ (တစ်ခြားသူတွေတော့ မသိဘူး။ IT securityတို့ cryptography တို့ကို နည်းနည်းပါးပါး တီးမိခေါက်မိရှိတဲ့သူတွေအတွက် ပိုစိတ်ဝင်စားဖို့ ကောင်းမယ် ထင်တာဘဲ။ Biomedical Science ကျောင်းသူ ကွန်ပျူတာနဲ့ သိပ်အစေးမကပ်တဲ့ ကျမသူငယ်ချင်း တစ်ယောက်ကတော့ Dan Brown ရဲ့ စာအုပ်တွေထဲမှာ ဒီတစ်အုပ်တော့ ဘယ်လိုမှ နားမလည်တဲ့အတွက် ဖတ်လို့ မကောင်းဘူးလို့ မှတ်ချက်ပေးတယ်။)

ဇာတ်လမ်းကို အတိအကျ ပြန်ပြီး review မရေးတော့ပါဘူး။ ဖတ်ရင် အရသာ ပျက်သွားမှာစိုးလို့။ Hero နဲ့ heroin ကိုတော့ အရမ်းကြိုက်တယ်။

Susan Fletcher - ထုံးစံအတိုင်း မင်းသမီးဆိုတော့ သူ့ရဲ့ IQ 170 နဲ့မလိုက်အောင် ချောမောလှပတဲ့ အသက် ၃၈နှစ်အရွယ် Cryptography department ရဲ့ head။ JHU ကနေ သချင်္ာနဲ့ ဘွဲ့ရပြီး MIT ကနေ ဒေါက်တာဘွဲ့ရထားတာဆိုတော့ မျက်စိထဲမှာ ပုံဖေါ်ကြည့်တာနဲ့တင် အရမ်းကို အားကျဖို့ကောင်းနေပြီ။

David Becker – Spanish, French, Italian နဲ့ အာရှတိုက်ဘက်က စကား ခြောက်မျိုးလောက်တတ်တဲ့ George Town University ရဲ့ ပရော်ဖက်ဆာ က ဒီဇာတ်လမ်းရဲ့ မင်းသားပါ။

Digital Fortress ဖတ်ပြီး စိတ်ဝင်စားသွားတာက သူ့ဇာတ်လမ်းထဲမှာပါတဲ့ NSA ဆိုတဲ့ National Security Agency ကိုပါ။ အရင်က တစ်ခါမှ မကြားဖူးလို့။ အမေရိကန်လူမျိုးရဲ့ ၃%လောက်ဘဲ သိကြတဲ့ လျှို့ဝှက် အဖွဲ့အစည်းတစ်ခုလို့ စာအုပ်ထဲမှာ ဆိုထားတယ်။ NSA ဆိုတာ No Such Agency ဆိုပြီး နောက်ပြောလေ့ ရှိကြသေးတယ်တဲ့။ အများအားဖြင့် စာအုပ်တွေ ရုပ်ရှင်တွေက တကယ်မရှိတာတွေကို ဇာတ်အိမ်တည်ပြီး ရေးလေ့ ရှိတာဆိုတော့ တကယ်ရှိလားမရှိလားဆိုတာ သိချင်မိတယ်။ စာရေးဆရာရဲ့ အဆိုအရကတော့ NSA ဆိုတဲ့ အဖွဲ့အစည်းက တကယ် ရှိပြီးတော့ ကမာ္ဘကျော် CIA လောက်နီးနီး ကြီးတဲ့ အဖွဲ့အစည်းတစ်ခုပါတဲ့။ ၁၉၅၂ ခုနှစ် နိုဝင်ဘာလ လေးရက် မနက် ၁၂နာရီ တစ်မိနစ်မှာ စတင် တည်ထောင်ခဲ့ပြီးတော့ အခုဆိုရင် ဝန်ထမ်းပေါင်း နှစ်သောင်းငါးထောင် နှစ်စဉ် ဘတ်ဂျက် ဒေါ်လာ ၁၂ဘီလီယံနဲ့ လည်ပါတ်နေပါတယ်။ FBI, CIA နဲ့ တစ်ခြား အမေရိကန် အစိုးရ အဖွဲ့ အစည်းတွေက NSA ရဲ့ information အပေါ် မှီခိုနေရတယ်လို့ဆိုရင် NSA ရဲ့ အရေးပါမှုကို ခန့်မှန်းလို့ ရပါတယ်။ အရင်တုန်းကတော့ telephone conversation တွေ FAX တွေကို tap လုပ်ပြီး နိုင်ငံတော်ကို ခြိမ်းခြောက်တဲ့ အန္တရယ်တော်တော်များများကို ကာကွယ်နိုင်ခဲ့တယ်။ အခုနောက်ပိုင်းတော့ Email တွေကို အဓိက ပစ်မှတ်အဖြစ်ထားတယ်။ လူတွေက သူတို့အီးမေးလ်တွေကို ပိုပြီး လုံခြုံအောင် ဘယ်လောက်ကောင်းတဲ့ encryption technique တွေ သုံးသုံး နောက်ဆုံးတော့ NSA က ကမာ္ဘ့အတော်ဆုံး cryptographer တွေရဲ့ decrypt လုပ်တာ ခံရမှာဘဲ။

National Security Agency headquarters, Fort_Meade, Maryland

NSA တော့ တကယ်ရှိပေမယ့် စာအုပ်ထဲမှာပါတဲ့ TRANSLTR ဆိုတဲ့ processor ၃သန်း နဲ့ ဖွဲ့စည်းထားတဲ့ supercomputer ကတော့ fiction ပေါ့။ တကယ်ရှိရင်လည်း ရှိနိုင်တယ်။ စာအုပ် တစ်အုပ်လုံး အဲဒီ TRANSLTR ကို ဇာတ်အိမ်တည်ပြီး ရေးထားတာပါ။ အဓိကတော့ cipher text (စကားဝှက်) တွေကို brute force နည်းနဲ့ decipher လုပ်တဲ့ supercomputer ပေါ့။

ဒီစာအုပ်ဖတ်ပြီး ၂၁ရာစုမှာ တိုးတက်လာတာနဲ့အမျှ လူတွေဟာ တစ်နေ့ထက်တစ်နေ့ privacy ကင်းမဲ့လာကြတယ်ဆိုတာကို ခံစားလာရလိမ့်မယ်။ ကိုယ့်ရဲ့ ATM ကဒ်၊ ခရက်ဒစ်ကဒ်၊ ရထားစီးဖို့ ဘတ်စ်ကားစီးဖို့ စသဖြင့် စွယ်စုံ သုံးလို့ရတဲ့EZကဒ်(touch-n-go) တွေကတဆင့် တစ်နေ့တစ်နေ့ ကိုယ်ဘာလုပ်တယ်၊ ဘယ်သွားတယ်၊ ဘာဝယ်တယ်ဆိုတာ one-click နဲ့ တစ်ခြားသူတွေ သိခွင့် ရသွားပြီ။ ကိုယ့်ရဲ့ Handphone ကနေ တဆင့် ကိုယ်ဘယ်ရောက်နေလဲဆိုတာ အလွယ်တကူ track လုပ်လို့ ရလာပြီ။ (ဒါကြောင့် အိုစမာ ဘင်လာဒင်က ဒီနည်းပညာအသစ်တွေ ဘာမှ မသုံးဘူးဆိုဘဲ။ ;-) ) အခု နောက်ဆုံးထွက်တဲ့ TEMPEST ဆိုတဲ့ နည်းပညာနဲ့ မိမိနဲ့ ပေတစ်ရာ အကွာကနေ (အုတ်နံရံခြားနေရင်တောင်) ကိုယ့်ရဲ့ ကွန်ပျူတာ ကီးဘုတ်မှာ ဘာစာတွေ ရိုက်နေလည်း ဆိုတာ tap လုပ်လို့ ရပါသတဲ့။ အံ့ရော..အံရောကွယ်.. QWERTY keyboard မသုံးဘဲ ကိုယ့်ကိုယ် keyboard တစ်ခု အသစ် တီထွင် သုံးရမလို ဖြစ်နေပြီ။

Digital Fortress ထဲမှာ အဓိကထားပြီး ပြောသွားတဲ့ Encryption techniques တွေကတော့ Ceaser Box ပါ။ ကမာ္ဘ့ ပထမဆုံး encoder ဖြစ်တဲ့ ဂျူးလိယပ်စ် ဆီဇာ ထွင်သွားခဲ့တဲ့ နည်းလမ်းပေါ့။ မဂျစ် တော့ စိတ်ရှည်လက်ရှည် ရှင်းပြထားတယ်။ ဒါပေမယ့် စာရေးဆရာက IT လိုင်းက မဟုတ်လေတော့ သူ့စာအုပ်ထဲမှာ အမှားတော်တော်များများ ပါတယ်လို့ wikipedia က ဆောင်းပါးမှာ ထောက်ပြထားပါတယ်။

အားလုံးထဲမှာတော့ villain နေရာမှာ ရောက်နေတဲ့ ဂျပန်လူမျိုး Ensei Tankado က အတော်ဆုံးဘဲလို့ ထင်တယ်။ ဉာဏ်လည်း တော်တော်သွားတယ်။ သူတစ်ယောက်တည်း ဒုက္ခပေးလိုက်တာ NSA တစ်ခုလုံး ရေရေလည်လည် ခံလိုက်ရတယ်။ Tankado ပြောသွားတဲ့ “Who guard the guards?” ဆိုတဲ့ မေးခွန်းလေးက တကယ်ကို အဓိပ္ပါယ် ရှိလွန်းတယ်။ စာရေးဆရာ Dan Brown က သူပြောချင်တဲ့ စကားတော်တော်များများကို Tankado ကို နေရာကနေ ရေးထားပုံဘဲ။ mutation strings တွေ အကြောင်းလည်း စိတ်ဝင်စားတယ်။ နောက်မှ သေချာလေ့လာပြီး ပို့စ်ရေးရမယ်။ တကယ်ကောင်းတဲ့ စာအုပ်တစ်အုပ်မို့ မဖတ်ရသေးရင် ဖတ်သင့်တဲ့ စာအုပ်တစ်အုပ်အဖြစ် recommend လုပ်ချင်ပါတယ်။

Without Wax,
Thinzar (David Becker ကို အားကျလို့ ahee…)

Photo credits: http://commons.wikimedia.org/