Floria 2011: Putrajaya Flower and Garden Festival

ဒီနေ့ ကိစ္စတစ်ခုနဲ့ Cyberjaya ရောက်သွားတယ်။ ပြီးသွားတော့ ရုံးကိုလည်း မပြန်ချင်သေးတာနဲ့ ဘယ်သွားရင် ကောင်းမလဲဆိုတော့ Putrajaya မှာ လုပ်နေတဲ့ Flower and Garden Festival ဆိုတဲ့ ကြော်ငြာကို သွားတွေ့တယ်။ 9-17 July ဆိုတော့ ၉ရက်နေ့က တစ်ကယ် ဖွင့်ပွဲလုပ်လိုက်တာဘဲ။ အဲနေ့က KL မြို့ထဲမှာ လူသုံးသောင်းလောက် ဆန္ဒပြနေပေမယ့် ဝန်ကြီးချုပ်ကတော့ အေးဆေးဘဲ၊ ပူထရာဂျာရာမှာ Floria 2011 ဖွင့်ပွဲလုပ်နေတာကိုး။

Putrajaya ဆိုတာ မလေးရှားရဲ့ အစိုးရ ရုံးစိုက်ရာမြို့ပါ။ ခုနောက်ပိုင်း Kuala Lumpur ကနေ သွားမယ်ဆိုရင် public transport တော်တော်အဆင်ပြေလာတာ ဒီနေ့မှ သတိထားမိတယ်။ KL Central ကနေ ERL ရထား KLIA transit နဲ့ဆို နာရီဝက်ဘဲ၊ RM 9.50 ဆိုတော့ ဈေးလည်း မဆိုးပါဘူး။ ရထားက နာရီဝက်တစ်စီးလာတယ်။ ဘတ်စ်ကားနဲ့သွားလည်း ရောက်ပါတယ်။ ဒါပေမယ့် ဘတ်စ်နဲ့ဆို တစ်နာရီလောက်တော့ ကြာတယ်။ အဲရထားဖြစ်ဖြစ် ဘတ်စ်ဖြစ်ဖြစ် Putrajaya Central ကို ရောက်ပါမယ်။ အဲကနေ Putrajaya တစ်ခွင်ကို ပြေးဆွဲနေတဲ့ ဘတ်စ်ကားတွေ အများကြီးပါဘဲ။ information counter ကိုသာ ဘယ်ကားစီးရမလဲ မေးလိုက်ရင် တစ်ခါစီး ပြားငါးဆယ်နဲ့ Putrajaya မှာ သွားချင်တဲ့ နေရာကို ရောက်ပါတယ်။

ဝန်ကြီးချုပ်ရုံး၊ Putra mosque ၊ Tuanku Mizan Zainal Abidin Mosque(Steel Mosque) နဲ့ Putrajaya bridge

အရင်နှစ် Floria 2010 တုန်းက ပြီးခါနီးမှ ရောက်သွားတော့ ပန်းတွေ တော်တော်ညှိုးနေပြီ။ weekend ဆိုတော့ တိုးလိုက်ရတာလဲ အသေအလဲဘဲ။ ဒီတစ်နှစ်တော့ စောစော ရောက်သွားတော့ ပန်းတွေက လန်းနေသေးတယ်။ နေပူကျဲတဲထဲမှာ တစ်နာရီလောက်ပါတ်ပြီး ချွေးတပြိုက်ပြိုက်ကျအောင် ပန်းတွေကို ဓါတ်ပုံလိုက်ရိုက်ပါတယ်။ ညနေသုံးနာရီလောက် ရောက်သွားတာ ရုံးဖွင့်ရက်ဆိုတော့ လူတော်တော်ရှင်းနေတာကို သဘောကျမိတယ်။ ဒါပေမယ့် ပုံ ၁၅၀ လောက် ရိုက်ခဲ့တာ လှတပတ ထွက်လာတာ ၁၀ပုံတောင် မပြည့်ချင်ဘူး။

အဝင်ဝနားက Indoor ပြခန်းထဲမှာ နိုင်ငံတကာက ပန်းအလှဆင်ပုံတွေ၊ Dinner Table ပန်းအလှဆင်ပုံ၊ Theme အမျိုးမျိုးနဲ့ ပြိုင်ပွဲဝင်ထားတဲ့ လက်ရာတွေစသဖြင့် တွေ့ရတယ်။ တော်တော်တော့ ရှုပ်ရှုပ်ယှက်ယှက် လုပ်ထားကြပေမယ့် အနုပညာကို အဲလောက် မခံစားတတ်တော့ ဖလားဝါးတွေဟာ ပန်းပွင့်ပါဘဲဆိုပြီး ဒီအတိုင်း ကြည့်တယ် ဓါတ်ပုံရိုက်တယ် ထပ်ကြည့်တယ် ပေါ့ကွယ်။ :D

ဒါကတော့ နိုင်ငံတကာက ပြိုင်ပွဲဝင်လက်ရာအချို့ပါ။

အပေါ်ကပုံထဲက Grand Entrance ဆိုတဲ့နေရာမှာ တော်တော်ကြာကြာ ရပ်ကြည့်မိတယ်။ ဒီလိုမျိုး ကိုယ့်ရဲ့အိမ်ထဲမဝင်ခင် ပန်းတွေ ဝေဝေဆာဆာ ပွင့်နေတဲ့ ခြံလေးကို ဖြတ်သွားရရင် တကယ်စိတ်ကြည်နူးဖို့ကောင်းမှာဘဲ။ 

နှင်းဆီနဲ့ သစ်ခွက ရိုးနေပြီမို့ တစ်ခြား ပန်းသေးသေးပိစိလေးတွေ လိုက်ရိုက်ဖြစ်တယ်။ ကျောင်းအလိုက် ပန်းခြံပြိုင်ပွဲ၊ ပြည်နယ်အလိုက်၊ တက္ကသိုလ်အလိုက် စသဖြင့် ပြိုင်ပွဲကဏ္ဍ အစုံပါဘဲ။ နောက်ဆက်သွားရင် ပန်းပင် ပျိုးပင် မျိုးစုံကို ဈေးချိုချိုသာသာနဲ့ ရောင်းတဲ့ ဆိုင်လေးတွေ ရှိပါတယ်။ ဒီမှာ သစ်ခွတွေ ဈေးပေါတော့ မြန်မာပြည်သယ်ပြန်ဖို့ ကြံစည်ဖူးတယ်။ ကျန်းမာရေး ဝန်ကြီးဌာနကနေ ပိုမွှားကင်းစင်ကြောင်း လက်မှတ်ပါရမယ်။ မြေကြီးမပါဘဲသယ်ရမယ် စသဖြင့် ရှုပ်လွန်းလို့နောက်ဆုံး လက်လျှော့ထားတာ။ 

Collage လုပ်ပစ်လိုက်တော့လည်း ပုံတင်ရတာ သက်သာသွားတယ် :D တနင်္လာနေ့ ရုံးမတက်ဘဲ လျှောက်သွားရတာလည်း မင်္ဂလာ တစ်ပါးပါဘဲ။